اركب لنعيم الجهل منين
واودي الفكر الزايد فين
وعشان العقل اكيد زينه
ف انا بايع الزايد من زيني
وراضي بالشين
ولا اهين ولا اهون
ولا اسهر ليل
ولا أغنى ياعين
اركب لنعيم الجهل منين
انا عايز أكبر ف دماغي
وأكبر فوق كل الافكار
انا أكبر حلم ف صغري حلمته
اروح اسوان واشوف بكار
وان مت ف يوم
وجات سيرتي
يضحكوا ويقولوا
مات ف هزار
كان مالي ومال ام الغابة
واسود بتدبح ف ديابه
وهنا اوعي - لتدوس افعي
وهنا حرص - تعلب مكار
انا عايز عيشه ببساطه
فكك من الناس الزياطه
محلاها البلحة ف سباطه
والطور اللاهي ف برسيمه
وحشتني الذرعة والترعة
والناس اللي بتصبح ترعي
وبتحمد رب العالمين
وان ضاق الحال مره ومالت
تسجد وتقول أفرج يا معين
مش عايز الناس الكذابة
انا كارهه الناس الملاعين
مش هكذب واعمل فيها ملاك
لكن اقسم هما شياطين
مش منهم ولا كنت شبههم
وخداني الدنيا ف مواويلهم
مش عارف بقت اشبه مين
انا طيب ولا اوسخ منهم
انا أحسن ولا من التانيين
دلوني ان كنت عليكوا غالي
او كنتوا عليا من الغاليين
من غير شفقه ولا صدقه
ولا مدت ايد اشحت ف جواب
دلوني واهو اجر وثواب
من غير منه ولا كسرت عين
اركب لنعيم الجهل منين
واودي الفكر الزايد فين
دلوني ان كنت عليكوا غالي
او كنتوا عليا من الغاليين
#محمود_حنفي
Mahmoud Hanfy
يهمنا سماع رايك ( ضع تعليقك هنا )