عبد الخالق

عبد الخالق

 يا واد امتي تتعدل 
مش الظروف 
يا واد اقصدك انت 
وسيب الخلق للخالق
ياعبد الخالق بلاش انت
 
ما تعدل نفسك الاول وتتحول
دا عامنول حلفت يا ودا هتتغير
وتبقي حد غير الحد غيرك انت 
وسيب الناس لرب الناس 
لحد يكون صافي قلبه 
مالي قلبه بكل الناس 
عدا انت
 
يا داخل جوه قلوب الناس 
ماليها وعود وريحه عود 
وباني احلام ورامي وعود
تسيبها خراب ولف وعود

ياعشره هباب تعيش وتموت
وهذا الداء ما لاقي دواء
ف جرح الناس تعيش مبسوط

يا عبدالخالق ياواد اصحي

دا حال الناس بقي يحزن

تعبنا نداوي ف الجرحي 

لا نافع فيك كلام غيرك

لاشيخ حاره ولاجامع ولامؤذن

يا عبدالخالق ياواد اصحي

دا حال الناس بقي يحزن

وتعمل ايه ياعبد المقصود

في عبد الخالق
دا واد قلبه سواد حالك 
بكفايه فعايله في المخاليق 
مع غدره قلوب بتضييق 
وجرح الناس يا يا ابن الناس 
مخلي قلوبها قايدها حريق
 

مفيش حاجه هتعملها 
يعقلها ويسمعها 
تقوله الكلمه بنصيحه 
يسد ودانه وشيطانه يرجعها 

وعقله مطاوعة
وشيطانه يسابق ريح
ولأجل الحق ولأجل إني
امين صريح
 
دا كان ابيض بقلب ابيض 
يساع الناس مايملش 

يدل الخلق لو في الخير  

ولو كان شر ميدلش 

وكان امين علي المساكين 
في قول الحق
لو السياف ع راسه 
يقول الحق ما يضلش

 

ولا يذكر ف خير فضله
ولا يندم على عمله

وعين في الحق ما تخجل 

لا تهاب حد ولا ترمش

يزيد الدق ع راسه
تزيد الناس ف احقادها
يغمض عينه ويطنش

 وكان ناقص من الزلات
وكان زايد من الحسنات
وكان زاهد بلا شهوات
وكان صندوقه للأمانات
ان ما زاد ما يقلش

وكان قلبه رقيق حساس 

وكان شايل هموم الناس

كما الجبل ما يتهزش

وكان دمعه قريب للخد

في محنه غيره لو حانت

يشيل الحمل مايهمش

وكان عقله ميزان حساس 
وعمره ما كفته مالت

مادد ايده لكل الناس مايكلش 

وكان قلبه سكن للكل
براح ومريح

في يوم غادر جرح قلبه 
 وسابه جريح ولا اهتمش 

يداوي جرحه بطول صبره

ودمه يسيح

وجراحه حالفه متلمش

وكل الناس كانت شايفه
ولا نطقوا 
تشيله موجه يحطه الريح
ولا حنوا ولا رفقوا

ولا حزنوا ولا دمعه
ولا حتى دموع تماسيح

يزيد الطعن ف قلبه
ما شاف دعوه ولا شفقه
ولوكلمه ولا نظره ولو تلميح

 
يسيل دمه ع صدره 
يموت قلبه على ايده 
فما دفنوا ولا حتى 

بنالوا ضريح
 
رجع عايش بدون قلبه 
كسيف مسلول ع خلقه 
ك غول مغلول ع تارة 
مفيش حاجه طفت ناره 
واتشقلب حاله علي حاله

بشكل رديء وطبع قبيح

وتعمل ايه ياعبد المقصود
في عبد الخالق
وعبد الخالق ما زاله جريح

وهب عمره عشان غيره

لكن غيره شافوا واقع

وسابوا طريح

ياعبدالخالق ياسيد الناس

انا اسف لسوء ظني 

وانا اسف علي التجريح 

يا عبد المقصود سيبه فحاله

وانا شاكر لك التوضيح

............

#M_A_N

Mahmoud Hanfy

INSTA

 

1- flicker  تصفح المدونة علي فليكر 

2 pinterest  تصفح المدونة ma_hanfy

  

3-  مدونه بلوجر 

5-  مدونه بلوجر