عكس الاتجاه

ماشي عكس الاتجاه

والمعاكس زحمه جدا

ماشيين تايهين ف الحياه

بندور ع فرصه احسن

 ماشي عكس الاتجاه

لا أبالي للعواقب

دوشه كتيره جوه مني

واللي ماشي واللي راكب

كلهم بيقولو ا ارجع

قبل ما يفوت الاوان

قبل ما تغرق مصايب

دوشه بتزيد جوه مني

بتمحي اصوات الحبايب

بتقولي كمل طريقك

واللي يرجع يبقي خايب

 كم مخالفه مش قضيه

ضيفها علي باقي المطالب

والسداد ماهوش حكاية

طول ما عقلك ف النهاية

عاجبه الطريق وحابب

 ماشي عكس الاتجاه 

رافض ادفع الضرايب

واللي قلبه جايبه يجي

واللي هيعطل طريقي

هينوبه من الحب جانب

ف المعاكس ناس كتير

اللي شاب من التفكير

واللي لايبالي وساحب

واللي بيبدأ حياته

لسه شباب وقلبه شايب

 واللي ماشي غصب عنه

واللي كان صايع وتايب

واللي عامل فيها شيخ 

لأجل ما يزود ف ناسه

لأجل ما يكتر قرايب

 شفت اللي واكل ناسه

واللي ناسه واكله حقه

ف المعاكس كل عاكس

كله بيخبط ف بعضه

 كله بيقول نفسي نفسي

كله بيهرب بجلده

واللي ناكر فضل اخوه

واللي ناهب حق اخته

 ف المعاكس انت عاكس 

ف الطبيعي انك تشوف

كل شئ وجنبه ضده

ولو تقول انا مش معاهم

هيكتبوا عنك كتاب 

العبيط ماشي لوحده

 واللي قالك انا ف ضهرك

بيدور علي اللي سانده

واللي سانده سايب ايده

قبل ما الموجه ما تاخده

والضعيف يبكي ويصرخ

وكله بينهش ف لحمه

 ماشيين عكس الاتجاه 

رافضين الوضع ف ثاروا

في اللي مستسلم لحاله

لاعمره ركز ف اليمين

لا فارقله مين و مين

ولا فارق مين شماله

واللي رافض وضع حاله

واللي صبره ياما طال

واللي طال هدفه وناله

 مش مهم الوسيله

 لو يموت غيره وماله

حتي لو كنت ابن عمه

ولا لو كنت ابن خاله 

حتي لو كنت ابنه اصلا

اي حاجه ف طريقه

هي شرعاً له وحلاله

 واللي بيعاكس ف غيره

رافض يبقي ياناس ف حاله

مش شايف اللي ف ايده

واللي ف ايد غيره بيحلاله

 شفت ناس 

عاكسه المعاكس 

ناس جميله هاديه جدا

بتنام بعد العشا

وبتصحي والديك بيدن

 ناس بتجري علي قوتها

ناس هدفها الحياه

اللي جايه بعد موتها

ناس بترفض الغلط

وعمرها ما تستقوي صوتها

 شاورت ليهم من بعيد

بس همي ما شافوش

صرخت تاني من جديد

بس برضو مسمعوش

 مش شايفين 

شيء ف المعاكس

مش مهم مين معاهم

ولا فارق مين يعاكس

 همي فاهمين الحياه

والرضي آصل النجاة 

دولا الساده الافاضل

العزيمة جوه منهم

اكبر من الفين مناضل

 سالتهم عن حياتهم

نفسي اتحلي بصفاتهم

حاسس اني حد غافل

قالولي سر نجاتهم

اسعي بس ودا المطلوب 

كل شي قبلك مكتوب 

واللي بيحصل تحصيل حاصل

 قلتلهم خدوني معاكم

اقضي من عمري اللي فاضل

قالولي اعكس طريقك

وابداء رتب الجدوال

والقاعدة الاولي والأخيرة 

اعرف ان كله ماشي

ومش هيبقي حد فاضل 

ماشي عكس الاتجاه

والطريق ممل جداً

خدها نصيحه من اللي تاه

خليك ف السالك أحسن

...............

#M_A_N

Mahmoud Hanfy

INSTA

 

1- wordpress  تصفح الموضوعات

2- flicker  تصفح المدونة علي فليكر 

3- pinterest  تصفح المدونة  manw23   

4- tumbler تصفح  المدونه علي تمبلر  

                             

5-  مدونه بلوجر