يا نهار اسكت على الايام
شيك يا ابني على الاحلام
شوف كم حلم معاك اتحقق
واللي اتحقق كلف كام
كام من الوقت وكام م العمر
وكم الليل ف تعب ومعافرة
فا تقول عادي يغور الحلم
لما تكون هتموت وتنام
يا نهار اسكت ع الايام
ارجع احسب تأني من الاول
صبر نفسك باي كلام
يعني لأمتي الليل هيطول
مهما يطول لازم يخلص
واللي يقولك واثق يعني
قوله أنك مش اي كلام
فالحق قبل العمر ما يخلص
شيك تأني علي الاحلام
يا نهار اسكت ع الايام
لو كان حلمك تسكن قصر
اسال بس القصر بكام
اعمل نفسك ميت عادي
وابني مزار للزوار
واعمل جامع باسمك عادي
واعمل قبه وابني مقام
يانهار اسكت ع الايام
ولم فلوس لأجل البركة
وخلي الدفع بالإلزام
ضيفها تحت بنود الصدقة
واللي هيدفع يبقي تمام
واللي يعاند علشان يأكل
لم شيوخك تلعن فيه
وتقول عنه اللي ما فيه
وان فلوسه لازم تتطهر
وان تجارته اساسها حرام
يعني ضروري عشان يتأدب
تأخذ النص واكتر حبه
والباقي يروح للأيتام
يا نهار اسكت ع الايام
خليك سايق كدا ومكمل
قولنا ان رجول الفرخة
أحسن من اكل النعام
وان اللحم محرم شرعا
واللي بياكله كافر طبعا
خارج عن دين الاسلام
وان الكوبري فوايده كتيره
تحته اكشاك شكلها تحفه
وخف بلاوي وخف زحام
وان الدين سهل هيتسدد
مهما اتكوم بالأكوام
قدم قرض واخر غيره
وامضي ورقه وشيل الدعم
ومفيش اكتر من الاختام
وقول الحال أحسن من غيره
أحسن من بغداد والشام
عندنا كم مشكله معروفه
راح تنحل ونبقي تمام
التعليم مش وقته أساسا
ولا في صحه ولا اعلام
والسياحة مفيهاش بركه
اكمن فلوسها يعني حرام
اهدم خفرع واقتل خوفو
لان الشعب دا مؤمن جدا
بطل يعبد ف الاصنام
بص علينا يا ضي عنينا
طل علينا واختفي فتره
واخر الشهر اعملك عمره
واكشف شعرك وادعي علينا
ونزل صورتك بالأحرام
والله الشعب دا كتر خيره
ماشي مدوخ هربانه منه
من غير لا خمور ولا برشام
وانت مقامك علي وغالي
فبلاش تعمل عقل يعني
بمسطول هلوس باي كلام
يانهار اسكت ع الايام
M_A_N#
Mahmoud Hanfy
روابط اخري للمدونة
يهمنا سماع رايك ( ضع تعليقك هنا )