سلام مربع
للي شاور من بعيد
جانا سلم .ثم ربع
سلام مربع
اقعد ياسيدي معانا حبه
في اكله حلوه
وصحبه حلوه
مجمعه كل ال أحبه
والحكاوي كانت كتير
ومعندناش حاجه تستخبي
والنكت عايزه اللي يضحك
واللي كاه كاه واللي كركع
سلام مربع
شكلنا جرينا ريقك
لقمه حلوه تبر جسمك
تجري دمك بين وريدك
فك نفسك من الكسوف
سم ربك مد ايدك
واياك تقوم
من غير ما تشبع
سلام مربع
للي انصت للكلام
ثم سجل كل حاجه
فجاءه من وسطينا فلسع
سلام مربع
راح معدل في السناريو
ثم بدل كل حاجه
وكل كلامه علينا يوجع
سلام مربع
ل اللي سواده مالي قلبه
واللي قلبه ماس بيلمع
واللي حبيت حبه فيا
واللي عرفنا لاجل مطمع
سلام مربع
للي ماشي واللي عدي
واللي كان سريع فهدي
جانا يعتب ف اللي كان
طب صافيه يابا واناصافي
قلنا خلاص موقف وعدي
سلام مربع
ل اللي بيبوس الايادي
واللي بيكيد الاعادي
واللي مش ف دماغه عادي
للي طبعه نار وعصبي
واللي عايش هادي بادي
سلام مربع
للي ساعد واللي انكر
واللي لسانه اصله عسل
لو بلع ريقه بيسكر
للي راضي بحاله دايما
واللي سرحان وسط همه
واللي مسلمها لربه
واللي همه عليه بيكتر
سلام مربع
سلام مربع للجميع
للي شاري خاطرنا دايما
واللي فينا عمال يبيع
للي فاهم معني حلمي
واللي نفسه اني اضيع
للشاطر ابو عقل فاهم
ول البليد ابو مخ فاضي
وللمحنك و الضليع
سلام مربع
للي بيحاول يساعد
ول اللي ينكر
واللي جاحد
واللي مصدعنا برغيه
وللي عايش وضع صامت
واللي بتحركه كلمه
ول اللي علي وضعه ثابت
وللي ما شافتش حاجه
وللناس اللي ياما شافت
سلام مربع
للي عاش عمره فقير
واللي عنده الخير كتير
واللي كان معاه وضيع
سلام مربع
للي مش معروف ف ارضه
والباشا اللي صيته مسمع
سلام مربع
للي بيخاف ع الل منا
واللي خوفه كله منا
وللي راضي علينا صبر
واللي عايشها بس ستر
وللي فاكر رزقي منه
للي بيسيبنا وبيرجع
واللي لو سبناه يستني
سلام مربع
للي بيجامل بقوته
واللي مستقوي بصوته
واللي منقطنا بسكوته
واللي عمره غالي عندي
واللي حياته زي موته
سلام مربع
سلام مربع ببعته
ومطرح ما يرسي
للي راكب درجه اولي
ولللي متشعبط سبنسه
لللي عمره ما ينسي حاجه
وللي مهما تعيد له ينسي
سلام مربع
يهمنا سماع رايك ( ضع تعليقك هنا )