علي الرف

علي رفوفك أنا قاعد.. وآديني يا حلوة مستني
خدي وقتك.. خدي لفة.. ودوقي الغربة في قلوبهم
ولما يحي أنا دوري.. تعالي ونزلي الدمعة
ولا تلفي.. ولا تدوري..
ولو في كدبة تعباكي.. وناوية تسممي بحوري..

قولي إني مفيش مني.. ولا عني هتستغني
وأنا هفرح بأي كلام.. مش من ضعف.. ولكني
على الرف بقالي زمان.. ونفسي إني أتكلم
وألاقي حد يسمعني..

أنا ف أرشيف.. غويط ومخيف..
مكان ضلمة ومترطب
صاحب شهم.. ودمي خفيف
وكلي ما تيجي بيرحب

أنا الضحكة في وقت الضيق..
وأنا الوافي بألف صديق
أنا الرف اللي بيطبطب..

أنا السند.. بدون تزويق
لما الحزن فيكي يهد..
ولما الطاقة "بتشطب"

أنا الركن اللي فيه أسرار..
أنا ف حزنك.. أنا انـيـسـك
أنا على رف كلي غبار.. لكن فاهم أحاسيسك

أنا "الكومبارس" في اللقطة..
حبر واقع على اليافطة
وكان لازم يشيلوني..

أنا الحبر اللي سال مقهور..
عشان يمسح سواد ليلك
أنا واحد من "المجاميع"..
في مشهد حزن بشيلك

تعالي احكيلي كم ساعة.. عن الناس اللي جرحوكي

وداري كسرتك فيا ..زي ما هما كسروكي
وسيبي الهم على رفي.. وقومي امشي..
ما هو الكومبارس.. علي التتر...
خط ضعيف.. ميبانش

وأنا ع رف.. آخـر الصف..
مكان ضلمة.. ميتشافش

خدي وقتك.. ودوري في الوجوه عني
هتلاقي مفيش غيري..
تجيـلي.. وتنهشي مِني
وروحي وغيبي من تاني.. بدون ما تشيلي همي

يا ضامنه وجودي أتمني
في أرشيفك مكان ضلمة
وأنا ع الرف مستني

............