كل الاحلام احمال
احلم علي قد حيلك
يا تشد ياعم حيلك
وتسرح ف الخيال
احلم خطط بكيفك
قالو الجمل طلع نخله
ادي الجمل وادي النخله
وادي الشيله وادي الشيال
كل الاحلام احمال
يا تكون قد حلمك
وتعافر لاجل توصل
يا هنضحك علي خيبتك
ونقول هو اللي قال
سلو بلدنا الشماته
وهنشمت لما نشبع
ويجروا وراك العيال
ويقولوا الحلو خايب
شعره ابيض وشايب
حب يجرب ف حظه
وقع بخته ومال
كل الاحلام احمال
عافر عافر علشانك انت
حقق لو حته منه
مش لازم يبقي كامل
ربك واحد و وحده
اللي صفاته الكمال
ولع يا واد شموعك
بس داري عليها
مش كل الاحلام تتقال
يعقوب كان برضو ناصح
وقال ليوسف اسكت
ويوسف لما سكت
كان منع يعني قدره
منع القدر محال
لكن داري تداري
من اعين السكاري
ومن الناس الجمال
تجيب الجمل
ياخدوا النخله
تجيب الصعبه
يقولو سهله
مفيش جندي
بدون مخله
فلا تغفو ولو وهله
متسبش للاحباط مجال
ف شيل حلمك
علي كتافك
وعافر لاجل ما تحقق
وخلي الفكر من راسك
ولا تسمع ولا تدقق
يا اما عيالنا هيزفوك
وعيالنا قاعده تتمني
تموت ف الزفه والهيصه
ما هتصدق
كل الاحلام احمال
يا تكون قد حلمك
وتعافر لاجل توصل
يا هنضحك علي خيبتك
ونقول هو اللي قال
روابط اخري للمدونة
يهمنا سماع رايك ( ضع تعليقك هنا )