كلام منقول مع ناقل
يخلي الجمع يتفرق
تكون مؤمن تكون كافر
من امتي الفتنه بتفرق
تكون جاحد تكون شاكر
مع الوسواس ولا هتفرق
تعال ف فقره الساحر
وشوف الكلب بينهق
تكون راضي تكون ناكر
تكون حرامي وبتسرق
تكون صادق تكون امين
مدام موجود مع الملاعين
اهي مركب واهي بتغرق
تكون شحات مع الضايعين
تكون بتعد ف الملايين
هاتوه ف وسط بحورهم
ويعضك نابهم الازرق
تكون حكحوك تكون فزلوك
تكون ما تكون مع نسبك
هيجي يوم عليك يرموك
ولا تبكي عليك العين
ولا حد يجيب سيرتك
فبلاها تعد اوجاعك
وعد فلوسك احسنلك
واهي سبوبة دواره
هيفرق ايه تكون اول
مدام اللمة ف خماره
يا باني الجامع اسال
قبل ما تبني ف الجامع
متسأل عن دين الحارة
تكون اول تكون اخر
يعمل ايه صوت القران
ف وسط خلق سكارى
واديني بدعي ف كل اذان
لان الدنيا غداره
ف يارب عديها جمايل
فلو زعلان من الكلام
وكنت معبي او شايل
ف ابو اللي قال
وابو المنقول وابو الناقل
وابو اللي قال- وقال انه
مش قايل
وابو المعدول على المايل
وابو الخيبه اللي مش عارفين
نعبيهالكو ف شكاير
وابو اللي قال انا معاهم
علي اللي قال مش ساير
وابو اللي قال مينفعش
علي اللي قال كلام هايل
وابو اللي ايده احمرت
من التصقيف
وابو اللي بيطاطي
كاسر عينه بايع نفسه
لاجل رغيف
وابو اللي قال جميل رائع
مع ان كلامه سخيف
شبعنا كلامكم الماسخ
شبعنا نفاق مع تزييف
شبعنا كلام هاتوا ناكل
بقالي كيتر منمش العصر
طب ليه كل الرؤي تخريف
مسيرها الدنيا تثبتلك
مين ف اللمه كدابه
ومين ضدك ومين صريف
ومين هما أساس الناس
ومين دورهم يا دوب تشريف
ولو فاكر الدنيا بقيالك
نصيحه كمان هقولهالك
بلاش الفزبه للشيخ حسني
دا الشيخ حسني
عامل بيشوف لكنه كفيف
يا لسه بتبدا احلامك
يا مستجد
ف وقت الجد تحتاجني
تلاقيني رديف
تبص بعينك الحلوه
تبوس الارض
وعلي قفاك هسخن عيشي
واقمر يجي الف رغيف
ولو فاكر انا بكدب
ف ادي الكوره وادي الملعب
وفي جمهور يشوف ويقول
مين هاوي ومين حريف
يا لسه بتبدا احلامك
يا مستجد
ف وقت الجد تحتاجني
تلاقيني رديف
………..
Mahmoud Hanfy
يهمنا سماع رايك ( ضع تعليقك هنا )