قلبي مريض يعاني
مصاب ب الافراط
لا يفهم المعاني
ويعشق الاحباط
فشل طبيبي المعالج
في محاوله علاجي
سالني عن الحكايه
ف قلت يا حضرات
.........................عندي فرط مشاعر
وببيع مشاعر فرط
زي السجاير فرط
تفرح وتشربها
ولما تخلصها
ترميها وتدوسها
بجزمتك ع الارض
عندي مشاعر فرط
وعشان موسم المشاعر
نازل عليهم عرض
أرخص مشاعر قرب
ولو لسه بتجرب
ارميلي حجر النرد
وانت وحظك
يا اديك بسعر بالجمله
ياتشريهم فرط
قرب يا متبلد
متقولش متعنت
لغيت كل الشروط
مفيش عليك ولا شرط
عندي مشاعر فرط
خد لفه اسال جانبي
مش هتلاقي أرخص
من القلب اللي عندي
وشغال وفيه النبض
حلو وضميره صاحي
وبيبيكي ف كل فرض
عندي مشاعر فرط
عايز حب تعالا
عايز ود وماله
مدام هتدفع كدب
كل المتاح تناله
اديني بسمه منك
واديك الكون بحاله
عارف التاجر اللي قبلك
اداني كلمه حلوه
وسرق قلبي وشاله
كسره ورماه ف الارض
ولأجل العييب اللي فيه
نازل عليه العرض
عندي مشاعر فرط
قلبي ومستغني عنه
عندك فتره تجرب
ولو لقيته بايظ
ومشاعره بتهرب
وظهرلك عيب فيه
غير اللي قولت عليه
معاك الضمان يابيه
هاته تاني وانا اشتريه
او خد حقه وارميه
بس استفيد بالعرض
عندي مشاعر فرط
ولأجل الأمانة برضو
استخدموه كتير
والهم عنده عادي
وطوله قد عرضه
واسراره تملا بير
يعني محتاجه نضافه
معلش زي بعضه
مش هيكلف كتير
ومش محتاج ل قرض
دا كل عيوبه جوه
لكنه من بره
تقفيل بلاد بره
واخو الجديد بالضبط
وعشان تكونلي صافي
هديك خصم إضافي
ياعم فوق العرض
عندي مشاعر فرط
وفي عرض علي الضمير
لو كان يمشي معاك
من غير فلوس هتاخده
وعليه عرض الهلاك
هيندمك علي يومك
هيسهرك لو تغلط
هيزودلك همومك
وحياتك هتتلغبط
ضمير من الحزن شايب
بيحلل التفآصيل
بينبش ف الجراح
ويبكي ع الحبايب
بيحترم وجودهم
ويصون كل غايب
ويصون كل غايب
ضميري وقلبي واحد
بيخلوا شكلي خايب
وعشان زهقت منهم
نويت استغني عنهم
وحلال فيهم الطرد
عندي مشاعر فرط
نازل عليهم عرض
تلعب بيها شويه
ولما تخلصها
ترميها وتدوسها
بجزمتك ع الأرض
رمي الطبيب قلمه
وبكاني من آلمه
ولا قالي وصفه دواء
ولا خدت من حكمه
نزلت دموع منه
ف مسحها بكمه
بصلي نظره حزن
زي اللي ماتت امه
وقالي يا مسكين
شوفلك طبيب تاني
يعلاني في علمه
دا انا علمي مهما امتد
مهما وصلت لمجد
مفيش علاج عندي
لحد عنده قلب
سافف تراب الارض
سبت الطبيب ومشيت
ماشي بقول وبعيد
عندي مشاعر فرط
نارل عليهم عرض
عندي مشاعر فرط
نازل عليهم عرض
.............
Mahmoud Hanfy
يهمنا سماع رايك ( ضع تعليقك هنا )