اوعى تجرب تبقى تصريح
في العلاقات خليك كداب
خلى لسانك سابق قلبك
تبقى ملاك شهم وجذاب
حايل جامل صالح طبطب
زود حوارات كتر بهارات
حلى كلامك كون دحلاب
ولما ضميرك يبدا يتعب
احبسه وارميه في السرداب
انسي انك صاحب رؤية
او انك استاذ في النصح
شرق غرب تطلع تنزل
مهما هتعمل هى الصح
جرب تعمل فيها مناضل
عاند فكره او موضوع
فجاءه هتقلب جندي مقاتل
واسمع منها احلا الردح
انت وظيفتك ماشى وحاضر
كل مهامك طبل ومدح
لازم تمدح كل ما فيها
قولها صعب اقاوم عينك
حتى عيوبها بتحليها
قصه شعرك حلوه عليكي
احذر تقولها لبسك حلو
ولا اللبس بيحليكي
احذر تبقى الواد الدبش
هي اكيد الحلوة الطعمة
هى اللي محليه اللبس
اختار اسم يكون يبسطها
اختار حاجه بره الدفتر
سيبك من قمرايه وسكر
لازم تبقى فريد من نوعك
خلى كلامك مش متكرر
اوعى همومك تظهر ليها
احذر ان جراحك تظهر
مش عشقاك لأجل عيونك
دي عاشقه كونك متنكر
أرمي همومك ويا ضميرك
احبسه هيكفى السرداب
اوعى تجرب تبقى تصريح
فى العلاقات خليك كداب
لو بتفكر تبقى صريح
خليك عارف أنك قشه
واقفه لحالها في وش الريح
ياما يأخذها الريح وتسافر
ياما تقاوم وهتتكسر
وفى الحالتين راح تبقى الماضي
فجاءه وجودك راح يتبخر
اوعى تجرب تبقى تصريح
في العلاقات خليك كداب
خلى لسانك سابق قلبك
تبقى ملاك شهم وجذاب
#M_A_N
Mahmoud Hanfy
يهمنا سماع رايك ( ضع تعليقك هنا )