الحزن له اصوله
وانا معروف
ما بين ناسي
اصيل بأصوله متأصل
والفرح له معاده
وليه وقته
وانا كالعادة
مستهتر
على مواعيدي بتأخر
ومن الأصول لو فارقت يوم عزيز
لا ازيد كلام ولا اعيد في قول
لا أقول جبان ولا كان خسيس
ولا شفته غالي وكان رخيص
ولا كان مرض كان له غرض طلع مفيش
ومن الأصول وقت الفراق
احزن
اتعب
واصرخ في وش الفراق
واندم
واغضب
من غير دموع من غير بكي
علشان اعيش دايما عزيز
ولا انكسرش لو صدفه يجمعنا لقي
فاهرب
فقبل ما نقفل الصفحة
وننسي الماضي
ونفارقه
كلام ف القلب
ليك مكتوم
صحيح كاتمه لكن حارقه
فلا تسال في يوم عني
ولا تسألني
يوم امتي
انا عالقرب مستغني
واهي ماشيه ومش
واقفه عليك انت
انا ناكر جمال عينك
وريحه شعرك الحلوة
ومش فاكر بيوت شعري
ولا إني كتبتلك
ف
يوم غنوه
انا بكذب
ومين قالك انا بكذب
عشان ارتاح
عشان ارتاح
دا لا حضنك بقي يسعني
وضاق بيا ومش فاكر
باني قلت انه براح
انا صاحي من النجمة
ومين قالك انا بسهر
ولو شيطاني غلبني
وفكرني بأيامك
بصلي ركعتين لله وبستغفر
انا راحتي
بعيد عنك
انا عاشق لصوت البحر
وريحه الزرع الاخضر
ولو ف البعد
راح اتعب
ما انا من طين وبتأثر
هصبر نفسي بكلامي
واقول أجمد يا متأصل
لان الحزن
له اصوله
وانا معروف
ما بين ناسي.
اصيل بأصوله
متأصل
والفرح له معاده
يهمنا سماع رايك ( ضع تعليقك هنا )