مشهد من فرحي
..........
من وسط رقص البنات
انا شفت منظر
كان بيوشوشها فى سكات
انا قلت خير يارب استر
كان بيحكي عن اللى فات
ويقولها
كنا صغار وكنا شباب
ولما الشعر ابيض وشاب
زادنا جمال وزدنا وقار
بقي لينا بيت
بقي لينا عيله
ولما العمر عدي وفات
كل أيامنا القاسية الصعبة
بقي ليها طعم وذكري جميله
كبرنا خلاص يا ام العيال
والحمد لله انا شلت الحمل
ايوه صحيح انشغل البال
بس لا عمري جيت وشكيت
ولا عمر الحمل مره مال
عارفه كام مره بكيت
طب عارفه كم مره اتزنقت
عمري كله راح للبيت
لا عمري يوم قلت زهقت
ولا قولت كام مره اداينت
كل طلباتهم مجابه
والدعاء ساعه استجابة
مخلتوش
كنتي بصحي فى عز ليلي
كنت اصلي واسهر ادعي
كنت بدعي يارب سلم
كنت بقول يارب حوش
لوفيها شر هاتها فيا
بس عيالي تعيش عفيه
يارب ابني متتعبوش
وابنك الكلب العريس
كان فاكرها تخيل عليا
كان بيهرب من الدروس
وكان بياخد الفلوس
وانا أقوله من عنيا
يكنش شايف ابوه وزير
ولا فاكرني فاتح تكيه
كنت بديله وعارف
كنت سايبه وكنت شايف
بس كان ناصح وشاطر
والرد كان بسرعه حاضر
كان بيألف بس حويط
كان بيعيش حياته كاش
وكنت بعيشها بالتقسيط
بس كان يصعب عليا
لما يشوفها خالت عليا
او يفتكر ابوه عبيط
يآستي خلاص الليلة ليلته
خلينا نفرح يوم بالواد
مش هقلب فى الدفاتر
والله واحشني أقوله ذاكر
كانت أيامه اه يا ساتر
من العناد
وبداءنا نرقص فى الفرح
وسامحنا كل اللى جرح
ونسينا نار قلب انجرح
والوقت لما بينا سرح
الحاج قال لموا الفرح
الحاج كالعادة ياولاد
فى عز لحظاتنا السعيدة
واحيانا فى كل اللحظات
مسك الحديدة وقال خلاص
لمو ليلتكوا بدري بدري
الحاجه قالت اه يا حوستي
سيب الواد يفرح براحته
دا نص عمره فى غربه منسي
قال خلاص ارقص يا واد
وافرح كتير
وسيب يازفت ايد العروسة
ياك قالولك راح تطير
قال بتقول طول عمره منسي
طول عمرك واقفه صفه
وضد صفي
مين كان خلص الفلوس
اكل بره وشرب بيبسي
وانا شويه هروح اصلي
ونادوني وقت التصوير
اوعي يا غاليه بس تنسي
هعملو ايه ما هو برضو قدري
وابقى قولي له ان ابوك
هيصحيك من الصبح بدري
#M_A_N
Mahmoud Hanfy
يهمنا سماع رايك ( ضع تعليقك هنا )