شيزوفرينيا
تفضل ثابت على أهدافك
ماسك كل حبال الصح
كابح ضاغط على رغباتك
خايف تسقط جوه الفخ
شيزوفرينيا..
على يقين إنك بتغرق
بس شايف الميّه حضن
ماشي ورا "زَن" قلبك
ناسي إن عندك مخ
شيزوفرينيا..
الليل عكس النهار
والشمس غرب وشرق
كل حاجة كانت واضحة
يا عجبي لحظة الانهيار
متلخبط مش عارف الفرق
و س و ج كل اللي جاي اسئله
مابين شخصين مشتتين
ف شخص واحد
عقله بيعند لو قلبه رق
القلب عضله وله وظيفه
ايش فهمه وليه يدق
س: طب دا ينفع؟ طب ترضاها؟
ج: كله عادي لأجل رضاها
س: لو دي نجمة.. فين سماها؟
ج: السما في نظرة عيونها.. بس مين يجيب مداها؟
ولا ريح العطر فيها.. وردة سبحان من حلاها
س: شفت مكانك إيه جواها؟
ج: لا شفت عيونها وعشت معاها
س: العيون مش دايماً صادقة.. والقلوب ياما بتسرح!
ج: أيوه عارف.. بس ليه وأنا معاها كل ما فيّا بيفرح؟
س: أيوه يعني إيه بيحصل؟ يمكن أفهم لما تشرح.
ج: العيون عندي بتلمع.
. والإيدين بيجيها رعشة..
وعقلي فيها بيسرح
والخيال بتزوره نشوة..
كأني سكران من الحنان..
كطفل أول مرة يفرح
أفقد الحركة مكاني.. وأنسى أوجاعي في ثواني
لما كف إيديها يلمس.. كف إيدي في سلامي
تنطوي صفحة حروبي.. وينكتب كتاب سلامي
وأحسب امتي أشوفها تاني.. وأرقص لما الوقت يسمح
وأبص في الساعة وأخاف.. وألعن الوقت اللي عدّى
كل ما أقوله يجمعنا.. ينسى وبدل الجمع يطرح
وأندم على عمري اللي فات.. وأمسك في عنادي اللي قالي:
"الكرامة في السكات.. وإن جنحت للحب فاجنح"
وتصبح الأماني واقع.. زي ما الواقع أماني
وأحضن كف إيديها يمكن..
أنسى أوجاعي في ثواني ..كطفل أول مرة يفرح
س: طب في نهاية الحكاية؟
ناوي ترجع ليا باكي؟ ولا ناوي أنت اللي تجرح؟
ج: مش حاسبها بس خايف..
هو أنا بس اللي شايف؟
إن كف إيديها جنة.. ولا هو وهم زايف؟
هي جنة.. هي جنة ولا نار؟
يعني لو ناوي الفرار
قولي بس امتي القرار
ولا عادي مهما تقسي
هتنسي قسوتها وتصفح؟
اصل الحياد فالعشق جبن
ولأن السكوت في الحب عار..
فلن أبلغ حتى أبرح
هي زهره وانا هرعي
يمكن اخر ثمره تطرح
شيزوفرينيا
يهمنا سماع رايك ( ضع تعليقك هنا )