فتاة الفستان الأصفر
والشعر الغجري الأسمر
وبين السرايات
الكحل في عينك لونه اسمر
بيقول حكايات
على رقه صوتك انا بسرح
لما بتغني عيون القلب
وبقول يا سلام الله يانجاه
عباد الشمس بيبادلك
نفس شعورك
نفس اللمعان ف عيونك
نفس التوهان اللي بحسه
لما بتتكسفي فتبتسمي
وتحمر خدودك
والقط اللي ف بير السلم
بيضحك ليكي وبيسلم
بيتابعك لما تكوني خارجه
ويستني رجوعك
يملا المكان دوشه وزيطه
وبيسكت لما تغنيله
وبيعشق صوتك
فيسمع صوتك بتغني
والضحك المليان بعياط
وزعيقك عل اتفه حاجه
وعلو الصوت وسط الخناقات
واخرتها ولا بتعملي حاجه
وفي لحظه الجو بيبقي سكات
عباد الشمس لونه اصفر
والقط كمان كان اصفر
معلش انا بس بستفسر
ايه علاقتك باللون الأصفر
تحديداً يعني وبالذات
ولان الحب كمان درجات
فانا قبلك كنت ساقط ملحق
وحياتي مصدر للشبهات
بشحت احاسيس وبقول لله
اديني مشاعر خد حسنات
او احرص قلبك وابقي غفير
انا اصلي ف حبك اترقيت
وبدال النسر اخدت انا قلب
والرتبة اتقلبت صرت مشير
فبرغم اللخبطة والحيره
كل التفاصيل فيكي جميله
وكفأيه قلبي خلاص متصان
وسري معاكي ف اعمق بير
فتاه الفستان الأصفر
وصلت برقيه عشان خاطرك
مصنع اندومي بيبعتلك
بيقولك شكرا علي دعمك
كأفضل مستهلك للمنتج
مجربه كل الوصفات
واللحمة بتشكر فيكي جدا
بتقولك شكرا علي هجرك
خليكي ف اكل النباتات
والبيبسي فى رف التلاجة
مش باقي منه ولا حاجه
وحالفه ما هيبات
اجمل عبثيه في الكوكب
طبيعيه وعشان تفهما
تابع فى دراما واكشنها
خلط بين كل الروايات
محتاجه وزاره عشان تجمع
كم مره بتعيط ف اليوم
خنتها كم مره اثناء النوم
محتاجه المركزي للحسابات
انوبيس بيقولك انا جاهز
حارس المقبره عمره مات
والقصة في درج الكومدينو
بتقولك كملي حكياتي
وامليها بكل الدلالات
كل اللخبطة متقبلها
هتزود برضو انا قابلها
دا لو كنت عملت ف يوم حسنه
ربك بعتك ليا لاني
الحسنه بعشر حسنات
M_A_N#
Mahmoud Hanfy
يهمنا سماع رايك ( ضع تعليقك هنا )